Mae’r prosiect yn gweithio gyda merched ifanc yn y Rhyl, Wrecsam a Chaergybi i ddatblygu eu sgiliau a’u hyder yn yr awyr agored.  

Ymunodd cyfranogwyr y prosiect, Lacey a Georgia, â chyfranogwyr ym mhrosiect allgymorth cymunedol Ramblers Scotland ar daith i’r Cairngorms.  

Mae Lacey ar y sbectrwm awtistiaeth ac mae’n cael trafferth gyda’i hiechyd meddwl. “Mae wedi agor fy meddwl i lot o bethau ac wedi gwthio fy ffiniau,” meddai. “Mae hynny’n rhywbeth mawr i mi – mae wedi bod yn brofiad anhygoel. Gobeithio y bydda i’n gallu dod yn ôl oherwydd ei fod yn lle hardd iawn.”   

Helpu merched ifanc i gael mynediad i’r awyr agored   

Liv, ein Swyddog Rhanbarthol yng ngogledd Cymru, sy’n arwain y prosiect. “Mae’r ystod oedran 18-25 wedi’i nodi fel un anodd i ymgysylltu â hi,” meddai. “Ar ôl ysgol mae pawb yn cael eu taflu allan i’r byd go iawn. Gall pobl fynd ar goll, felly mae’n creu ymdeimlad o gymuned i’r merched. Maen nhw’n gwneud ffrindiau, cysylltiadau, ac wrth gwrs maen nhw’n cerdded – mae’n dda i iechyd meddwl a chorfforol.”  

Mae gogledd Cymru’n ymfalchïo mewn golygfeydd godidog ac mae’n denu cerddwyr o bob cwr o Brydain a thu hwnt. Ond gall diffyg sgiliau a hyder atal pobl rhag mwynhau’r dirwedd hardd ar ei stepen drws. Mae prosiect Merched yn Cerdded wedi bod yn helpu merched ifanc i ddatblygu eu hyder, ffitrwydd a sgiliau awyr agored. 

Yn ogystal â’r daith i’r Alban, mae cyfranogwyr hefyd wedi mynd i’r afael â heriau yn nes at adref. Rhoddodd taith gerdded undydd i Foel Lus gyfle i’r merched wthio eu hunain yn gorfforol a hefyd i archwilio eu hardal leol. 

Mae Tammy, a ymunodd â’r grŵp drwy brosiect Barod Sir Ddinbych, yn dweud “doeddwn i ddim yn arfer hoffi cerdded, oherwydd roeddwn i’n dioddef gyda fy nghoesau oherwydd fy mhwysau. Dw i’n cael help gyda hynny ond dw i’n hoffi cerdded pellteroedd hir a gwthio fy hun er mwyn i mi, gobeithio, allu gwneud mwy o bethau drwy gerdded… Dw i wedi cwrdd â phobl hyfryd. Dw i wedi mwynhau pob munud ohono.” 

“Dw i wedi cwrdd â phobl hyfryd. Dw i wedi mwynhau pob munud ohono.” 

Tammy, cyfranogwr Merched yn Cerddded 

Ymunodd Ela â’r grŵp ar ôl symud i Wrecsam i weithio. Mae hi’n dweud “doeddwn i ddim yn nabod neb yno, felly roeddwn i’n teimlo’n eithaf unig ar y dechrau. Ac yna gwelais i hysbyseb am y grŵp cerdded yma a meddyliais i byddwn i’n rhoi cynnig arni. Mae’r awyrgylch wedi bod yn dda iawn, naws gyfeillgar iawn. Dw i wedi sylwi, ers Covid, ac ers i gostau byw fynd drwy’r to, ei bod hi’n llawer anoddach i bobl ifanc gyfarfod a chymdeithasu. Felly mae pethau fel hyn yn berffaith oherwydd eu bod nhw am ddim.”