Mae gwirfoddolwyr wedi arolygu 750 cilomedr o lwybrau yn Sir Gâr fel rhan o brosiect rhwng Ramblers Cymru a Chyngor Sir Gâr.

Gyda mwy na 2,500 cilomedr o hawliau tramwy cyhoeddus yn y sir, mae Partneriaeth Llwybrau Sir Gâr yn recriwtio, hyfforddi a chefnogi gwirfoddolwyr i arolygu llwybrau a darparu gwybodaeth gyfoes am rwydwaith y llwybrau, adrodd am broblemau a gwneud tasgau cynnal a chadw bach.

Ar ôl 18 mis, mae 79 o wirfoddolwyr wedi arolygu 750 cilomedr o hawliau tramwy cyhoeddus. Mae’r gamp enfawr yn cyfateb i gerdded hanner llwybr arfordir Cymru. Bydd y wybodaeth amhrisiadwy yn cefnogi ceisiadau am gyllid i ddatrys problemau ac i gynnal prosiectau gwella llwybrau.

Bellach mae 8 cilomedr o lwybrau wedi’u gwella o amgylch Carmel, yn ogystal â datrys mwy na 50 o broblemau ledled y sir. Mae Cyngor Sir Gâr wedi derbyn £28,060 o’r Gronfa Ffyniant Gyffredin er mwyn ymgymryd â gwelliannau ar lwybrau a arolygwyd gan wirfoddolwyr. Bydd dros 100 o broblemau’n cael eu datrys a bydd o leiaf 10 cilomedr o lwybrau’n cael eu gwella. 

Dwedodd gwirfoddolwr Chris: “Fel rhywun sy’n mwynhau cerdded yng nghefn gwlad, dwi’n teimlo ei bod hi’n bwysig gallu mynediad at gymaint o’n llwybrau cyhoeddus â phosibl. Rhoddodd gwirfoddoli i’r prosiect Partneriaeth Llwybrau gyfle i fi gyfrannu at y nod yma. Mae cymryd rhan wedi bod yn brofiad pleserus ac mae gweld rhai o’r gwelliannau a wnaed, gan gynnwys rhai o’r llwybrau dwi wedi’u harolygu, wedi bod yn foddhaol iawn.”

Yn barod i wirfoddoli?

Mae’r prosiect yn chwilio am fwy o wirfoddolwyr i’w helpu i gyrraedd eu targed 1,000 cilomedr erbyn mis Mawrth 2026. Gall pobl sydd â diddordeb mewn ymuno â’r tîm gwirfoddolwyr, a derbyn hyfforddiant llawn ar sut i arolygu eu llwybrau lleol, gysylltu ag amy.goodwin@ramblers.org.uk neu darganfod mwy yma.

Cydariannwyd prosiect Partneriaethau Llwybrau gan Gronfa Gymunedol y Loteri Genedlaethol a Chyngor Sir Gâr drwy Gronfa Gwella Mynediad Llywodraeth Cymru.